Itensiede by Mama Mascha yn it Lânboumuseum

Op snein 22 febrewaris is it dan safier. It Sinteklaaskado om mei de famylje in itensiedersworkshop te folgjen sil útpakt wurde. Om 12.00 oere wurde we wolkom hiten troch Nynke Dijkstra fan Mama Mascha ~ mei Nynke yn har itensiedersstudio. Dy is húsfeste yn in nije ôfdieling fan it Frysk Lânboumuseum yn Ljouwert en slút dêr fansels prachtich by oan: it Lânboumuseum mei omtinken foar de produksje fan iten en Nynke har studio foar de tapassing en it klearmeitsjen derfan. By in bakje kofje fertelt Nynke earst wat oer harsels en har missy achter har itensiedersstudio. Dy missy is om Nederlân sûner te meitsjen troch safolle mooglik minsken entûsjast te krijen oer sûn, lekker en maklik iten. Minsken sille har libbensstyl wierskynlik pas feroarje as se net allinnich de kennis hawwe, mar ek help krije by de praktyk: boadskipje en itensiede.

Mei-inoar itensiede

Dan geane we oan ’e slach. Earst krije we allegear in grutte skelk foar en útlis oer de wurkwize. Yn groepkes fan twa - troch sykte wiene we mar mei ús achten - nimme we elk in ûnderdiel fan it trijegongediner foar ús rekken. De yngrediïnten en de resepten lizze kreas foar elk groepke klear. Moal moat ôfwoegen wurde, griente en fruit wosken, skyld en snijd. Alles farsk, ferantwurde en sûn, neat út potsjes of blikjes. Under oaren blomkoalsop, quiche, slaad, bôle en iis stean op it menu. Wêr nedich jouwe Nynke en stazjêre Bente advizen.

As it wurk sa’n bytsje dien is en der noch wat yn ’e oven gear wurde moat, kinne we foar iten noch in slach troch it museum meitsje. Foaral de nije, fêste eksposysje oer it Frysk hynder makket yndruk. Dêrnei is it tiid om oan tafel en mei-inoar te genietsjen fan ús eigen itensiederskeunsten. It smakket allegear poerbêst en mei in foldien gefoel giet elk wer op hûs oan nei in learsume, smaaklike en gesellige middei.

Nynke Beetstra